Bolmaýanmyş. | YekeTak.Ru

Özümiziňki
Fantom [off]

22.02.2025 / 17:20
Iň uly baýlyk, bar zadyň bilen kanagatlanmakdyr.

Dostlar şu köne dünýäniň,
Hiç wepasy bolmaýanmyş.
Sözüm deňdir baý- garyba,
Hiç kim baky galmaýanmyş.

Işläp gazanyp ýörseňde,
Keýip sapalar sürseňde.
Goluň çermäp harsursaňda,
Bolmajak zat bolmaýanmyş.

Etseň ýazykly günäni,
Hakdan tapmarsyň penany.
Hor saklan ata-enäni,
Iki dünýe gülmeýänmiş.

Haramdan çekseň eliňi,
Gybatdan saklap diliňi.
Alla ýalkan öz guluny,
Hiç dowzaha salmaýanmyş.

Ilçe bolmaz ýasyň- toýuň,
Köp myhmanly bolmaz öýüň.
Başda ýitiren abraýyň,
Soňra gaýdyp,gelmeýänmiş.

Köp bolarmyş gaýgyň-gamyň,
Kynçylyk basan gadamyň.
Syrkaw,ýarawsyz adamyň,
Hiç zat gözüne ilmeýänmiş.

Gezip ýörseň Alla diýip,
Il halkyňa hormat goýup.
Ýaşasaň söýlüp-söýüp,
Gunça gülüň solmaýanmyş.

Ykbal oňa keç baksada,
Güýçli hassalyk ýyksada.
Ynsan ogly dert çeksede,
Wagty dolman ölmeýänmiş.

Adam şatlanyp gezmese,
Öz işin özi çözmese.
Alla kysmata ýazmasa,
Bolmajak zat bolmaýanmyş.

Arassa zähmet halal iş,
Berse wepaly ýan-ýoldaş.
Ýük bolsa-da gerekli daş,
Asyl agram salmaýanmyş.

Uzadan ýeriňe eliň ýetse,
Ogul-gyz hyzmatyň etse.
Şatlyk bilen ömrüň ötse,
Janda arman galmaýanmyş

Aýdar Hydyr gamly başym,
Saýgaramok ýakyn-daşym.
Boş bikär geçiren ýaşym,
Indi gaýdyp gelmeýänmiş.

Hydyr Gylyjow.