Ейжежик : Жизнь-это не игра #

 Täzeje
 IkinjiTarap [off]
 11.03.2025 / 19:49

Biz ynsan, biwepalygyň miweleri, Adam atanyň, How enäniň puşmanlygynyň, wyždan azabynyň mirasdüşerleri. Biz jenneti görmedik, olar bolsa jennetde ýaşadylar, lezzetini datdylar. Olaryň bar etmeli işi gadagan miwäni iýmezlikdi. Başarmadylar. Şeýdibem ýer ýüzündäki synaglary başlady. Adam atanyň jennete bolan küýsegi oňa juda azap beren bolmaly. Biz jenneti görmedigem bolsak, ol küýseg Adam atadan bize-de geçen bolmaga çemeli, bu dünýä hiç öwrenişip bilmedik. Hemişe biwepalyk etdik oňa, elbetde olam bize wepaly bolmady. Biz bu dünýä "Ýalançy" diýdik. Belki olam bize şeýle göz bilen seredýändir. Ol aýbyny biziň üstümize atdy, bizem ony günäkärledik.
Biz bu dünýä gelmeginiziň asyl sebäbini unutdyk, emma dünýä unutmady. Biz ýuwaş-yuwaş duýgular bilen tanyşmaga başladyk. Ynsanyň ilkinji tanyşan duýgusy nämedi? Adam ata heniz jennetiň hasratynda ýanýarka, ikinji agyr duýgy bilen tanyşdy. Ölüm, Kabyl Abyly öldürdi. Bahyllyk, ýigrenç, gahar-gazap, şularyň soňunda ýüze çykýan puşmanlyk, wyždan azaby... Megerem ynsan bularyň hemmesi bilen şol gün tanyşdy we hiç haçan aýrylmadylar. Bular bize-de miras galdy. Belki, şonuň üçin käbir adamlar biynjalyk ýaşaýarlar. Olar özlerini nämäniň biynjalyk edýänini bilmän ölüp gidýärler. Ölüm sebäpleri—ýürek sanjysy. Belki bu wyždan azabynyň sanjysydyr, kim bilýär...
A, söýgi bilen nähili tanyşdy ynsan? Dogrusy bu barada meniň hiçhili pikirim ýok. Dogrudanam nädip ilkinji sapar aşyk boldy ynsan? Pikirlenýän...
Belki söýgi-de bu dünýäniň lezzetleriniň biridir. Olam dünýäniň synagynyň bir bölegidir? Dogry, dünýäniň bize hödürleýän lezzetleri köp zatlary ýitirmegimize sebäp bolýar. Onuň islegem şolda asyldynda. Özüniň berýän lezzetleriniň ýerine biziň iň gymmatlary zatlarymyzy almak. Meselem: Iman, ynanç, ynsap, adamçylyk...
Ol bize öz-özümizi birnäçe toparlara böldürýär. Owadan, betgelşik, baý, garyp, akylly, jahyl...
Bular ynsany ynsandan tapawutlandyrmaly zatlar däl ýaly. Ynsanlaryň arasynda beýle saýlawlar geçirip, kimdir biri biziň nusgamyza dogry gelmeýän bolsa ony jemgyýetden uzaklaşdyrmak nä derejede dogry? Biziň ak diýýänimize ak diýmedigi üçin kimdir birini ýazgarmaga hakymyz barmy eýsem? Bu ynsanlaryň pikirlenmek hukugyny elinden aldygymyz bolanokmy? Hemme biziň penjirämizden seretmäge mejburmy?
Pikirlenip otursam, ynsan hiç haçanam bütin bolmady. Hemişe bir zady egsikdi. Hemişe has köp isledi. Hiç zat ýetmedi oňa. Şeýdibem bu dünýä gelmeginiň asyl sebäbini unutdy, emma dünýä unutmady.

Aýsapar Emelowa

Teswir ýazmak üçin Içeri giriň ýa-da Agza boluň →!