GÜL ÖMÜR | YekeTak.Ru

Premium

BAYOGUL [off]

21.04.2024 / 23:44
Aldamak aňsat biz ýaly sadalary

Arada bir sebäp bilen köne zatlarymy döküşdirip oturşyma başlanyp taşlanan gündeligime duş geldim. “Pylan ýere gitdim. Pylany bilen gürleşdim. Howa sowugam bolsa ynha, Gün çykar — türkmeniň gyşydyr-da” diýen ýaly gündeliklerde adaty duşaýýan ýazgylarymy okap oturşyma birden ýüregim jigläp gitdi. Ömrümiň sagatlar, pursatlar, gije-gündizler bilen parça-parça edilen böleklerini kesesinden synlan ýaly boldum.

Endige görä, düýnler-şu günler, ertirler-birigünler bilen ýaşap ýörüs. Bir günem ömrümiz kirpikleriň arasyndan daman damja mysaly damar-da ýere siňip gider. Diňe daşa daman damja manysyz pytrap gidýär. Adamyň ömrüni hem minutlara, sagatlara bölseň, manysyny ýitiren ýaly bolýar. Dirikäň — sil deýin akýan günleriň akymynda akyp barşyňa — ol pursatlara ömürdirem öýtmeýärsiň. Ömür damjasyny bölüp bolmaýandygy barada oýlanmaýarsyň.

Kyrkdan soň kybla çökemde
Şeýtan güldüňmi, güldüňmi?
Ejem galpagym öpende
Ömrüm güldüňmi, güldüňmi?

Ömrüňi tutuşlygyna göz öňüňe getirmek beýle agyr zatdyr öýtmeýärdim. Onuň içinde ýaltalygym, tutanýerli däldigim, ýeňlesligim, gadyryny bilmezligim, hakyky manysyna düşünmezligim… ýaly bir giden aýplarym sebäpli ahmyra öwrülen arzuwlarym bardy. Hatda arzuwyny etmelidirem öýtmedik zatlaryma gynanjym bardy.

Şol pursat goňşy otagdan ýetginjek oglumyň ýaňy ýognap ugran sesi hem gülküsi eşdildi. Bu edýän pikirlerim özümden beter ogluma has zerur ýaly göründi. Ony ýanyma çagyrasym, adama bir käse kofäni öňümize alyp gürleşesim, iç döküşesim geldi. Emma meni nämedir bir zat beýle etmekden saklaýardy. Utançmy, dogry düşünermi-düşünmezmi diýen ikirjinlemelermi — ýaýdandyrýardy. Asylam, türkmen — ogly bolsun, hala aga-inisi — ýüregindäkini diline alyp oturmagy halamaýar. Belki, şondandyr şu ýazgylary ýazyp otyryn welin, ýüregimden oňaýsyzlyk duýgusy gitmeýär. Emma köplenç ýaşkak pikirini etmän, ýaşymyz könelşensoň hem diňe ahmyr etmelidiris öýdýän ömrümiz hakynda gürrüň açmazlyk kyn.

Eýsem, ömür ökünç bilen tamamlanmaly bir zatmyka? “Hawa, ömür şeýle zat eken” diýmegiň ömrüňe hiç many gazandyrmajagy belli. Çynyň bilen “Ýok” diýmegiň welin, ömrüňden many tapmaga, gül ömrüňi, hakykatdanam, her kesiň höwes etjek gülüne öwürmäge peýdasy deger. Sebäbi tapjagyna umytsyz adam gözleýänini, heý, taparmy? Bu ömri bize beren Alla onuň manysyny tapmagy, ýaradylanlaryň iň gymmatlysy — ynsanyň öz ygtyýaryna goýupdyr. Megerem, şonuň üçindir, ömründe many bardyr öýtmeýäniň, ondan many gözlemeýäniň haýwandanam pes derejede görünýäni.

Ömrüňi minutlara, sagatlara, netijesiz pişelere pytratman tutuşlygyna görmäge çalyşmagyň şeýle peýdaly zatdygyny ýaňy sesi ýognap ugran ogluma nädip düşündirsemkäm?! “Durmuşyň özi düşündirer” diýip oňaýsammykam? Ony çagyrdym, kofe-de taýýar.

© Hydyr AMANGELDI

108

Forum | GÜRRÜŇDEŞLIK | Erkin mowzuklar

Bar eýle!

💎💎💎💎

Ýüregimiň armanydyr

Gel seýle çykaly

Adamlara ynanyp

Dillen..!

Owgan pähimleri

Dutar heňi🙂

At yazmak

Owgan pähimleri