Dreamfull : Durmush geñ zat.Oynap soyseñ bagt,cyndan soyseñ dert tapyañ!by Dream

 Gytyndan
 Baron [off]
 13.10.2024 / 13:54
 “Her setirim ruhumdaky ýaramdyr...”

Seň toýuňda serhoş boldum,
Içdim ömür içmeýänim.
Seni menden alan dünýäň
Günäsini geçmeýärin.

Dodaklaşdym bulgur bilen,
Häzir bi:liň guçmaýaryn.
Zyna etdim paýyş bilen,
Günämi öt, haýyş, gülüm!

Meň bognum ysmady asla
Seň toýuňda gamlanmaga.
Ýöne, nämüçindir, asman
Men bolup aglady şo gün.

Urulan söýgiň teninde
Gök-nil boldum gamdan galan.
Pulum sowdum,
Söýgim sowdum,
Sowdum eşiklerme çenli.
Şatlygymy gama satdym,
Ak bagtymy saňa satdym,
Gymmat düşdi maňa söýgiň
Çyrpynyp duran hasraty.
Begen!
Içi görünse-de,
Sen fataly, men ýalaňaç.
Maňa eşik boldy diňe
Ýalaňaç baglaň ýapragy.

Ýandym.
Maňa çoýundylar,
Duýmadylar, gussalydym.
Iş bitensoň suw guýdular,
Tüsseledim, tüsseledim.
Çilim deý tüssäň duýgusy
Üstesine üstümedir.

Seň toýuňda serhoş boldum,
Içdim ömür içmeýänim.
Seni bagyşladym, emma
Etegňe ýapyşan dünýäň
Günäsin hiç geçmeýärin.


©Eziz AMANNAZAROW

Teswir ýazmak üçin Içeri giriň ýa-da Agza boluň →!