Admin : «Gel» diýlip çagyrylan söhbet hemme zatdan süýji bolýar.

 Gytyndan
 Baron [off]
 27.10.2024 / 09:14
 “Her setirim ruhumdaky ýaramdyr...”

Pelek, gursagyňa serimi goýsam,
Jigerbendiň saýyp, ezizle meni!
Alnyňda ýekirlen ýerimi goýsam,
Jigerbendiň saýyp, ezizle meni!

Mähir — lagşan ýürekleriň söýesi,
Mätäç oňa ejizi hem çeýesi.
Men — halys müzzeren göwnüň eýesi,
Jigerbendiň saýyp, ezizle meni!

Zar bolmasa agyz burna, göz — gaşa,
Göz owasy gelişenok gözýaşa...
Tamakin däl togsan ýaşa, ýüz ýaşa,
Jigerbendiň saýyp, ezizle meni!

Tapsam gussaň lezzetlisin — oňaýyn,
Ejir beren şatlygymy zyňaýyn!
Şu çaka gepledim, häzir dymaýyn...
Jigerbendiň saýyp, ezizle meni!


24.03.2017ý.


©Sapa HOMMADOW

Teswir ýazmak üçin Içeri giriň ýa-da Agza boluň →!