Gündeligimden (dowamy)

Premium

Belki [off]

Şugün, 05:25
Sen durmuşyma girseň, ýalňyzlyga ikilik edýän ýaly

05.10.2024 ý.

Bu gün şenbe güni. Öýüň işlerine, kitaplaryma wagtymy sarp etmekçi. Giçlik bolsa Muhammetguly daýymyň belli güni. Ejem bile gideli diýýär. Oňa ýekelikde gidibilmejegimi aýtdym. Köpçülikde özümi has-da ýeke duýýan. Her kimiň bir durmuşy bar. Men bolsa nämedir bir zatlara garaşyp ýörün. Ine, şu ahwal köpçülikde has beter duýdurýar.
Gündeligimi özüm üçin ýazýan ýaly görünsemem, onuň çeper we gyzykly bolmagy üçin jan edýän. Bu gerek däl ahyry. Bir gün köpçülige okadaryn diýip ýazsam ýüregimdäkileri we serimdäkileri ýeterlik derejede dogruçyl beýan edip bilmejek ýaly. "Ýalysy" artykmaç. Özüm üçindigini unutmaly däl!!! Barybir meň içgysgynç durmuşymy okamak hiç kim üçin gyzykly däldir.

****
Bu gün oňa duşdum. Jümleleri hemişeki ýaly zäherli. Men oňa aşyk bolup näme gazandym? Gözýaşy hemem nerw dartgynlylygy. Ýöne geň galaýmaly, onuň üçin aglamak lezzet berýär. Ýaşaýanlygymy duýýan. Her gezegem hiç kime gaýdyp beýle ägirt duýgulary duýmajagyma düşünýän. Bu diňe yşk. Ejirem eziz, mähribanlygam.
Meniň bu yşkyma mynasyp däl diýip pikir edýän. Barybir duýgularym egsilenok. Bu gözýaşlary ondan başga hiç kim üçin dökülenok...

******

11.10.2024

Hasaplap otyryn welin, alty gün bäri gündeligimi ýöretmändirin. Hem ýaltalyk, hemem oňa ýazjak derejede durmuşymda özgerişlik bolmanlygyndan. Ýazmadygymça-da ýazasym gelenok. Köp wagt bäri habarlaşmaýan joralarym bilen durmuşymda möhüm bir zat bolmadygyça habarlaşmak islemeýşim ýaly.
Gün tertibim şeýle bir erbet. Agşam sekizlere ýatyp galýan. Gije ikilere-de ýüregimde ägirt boşluk hemem ýalňyzlyk duýgysy bilen oýanýan. Ýöne gündeligime ýazdygymça bu boşluk ýeňleýär, manylaşýar. Bir serialyň içindäki ejir çekip ýören, ahyrsoňunda maksadyna ýetmeli gahryman ýaly duýýan özümi.

12.10.2024.

Meni boşluk duýgusyndan näme halas edip biler? Diňe ýazmaly, okamaly. Ýalňyzlygym bilen ýaraşyk baglaşmaly. Oňa öwrenişmeli. Rast, ykbal saňa ony beripmi? Gaçara ýol ýok. Onuň bilen ömrüňi gyzykly geçirmegiň ýollaryny agtarmaly.
Öňümizdäki sişenbe kitaphana gitmeli, okan kitaplarymy tabşyrmaly, täze kitaplar almaly, ýüzümiň ugruna-da diskçiden soran filmlerimi geçirtmeli. Ýaman ýeri, heniz alan kitaplarymyň soňkusyny okap başlamok. Iki sanysyny-ha başlap taşladym. Biri Dumbadzeniň kitabydy. Halaýan ýazyjymyň eserine girişibilmezligimem geň galdyrdy. Mendenmikä ýa eser dogrudanam ýaramazmyka?
Soňky döwür goşgy ýazyp bilemok. "Goşgyny taşladyňmy?" diýýärler. Onuň meni taşlandygyndan habarlary ýok. Ýogsa, bilip-isläp terk ediljek dünýämi şygryýet dünýäsi?!
Şu gündeligime bir gün "Men özümi juda bagtly duýýan!" diýibem ýazarmykam? Şu soragyň jogabyny şeýle bir bilesim gelýär.

28.10.2024

Köp wagt bäri hiç zat ýazmaýşym ýaly gündeligimem ýazamok. Ýöne düýn Ogulşat Myratberdiýewa bilen tanyşdym. Käbir aýdan zatlaryny durmuṣyma ornaşdyrmak barada oýlanýaryn...

30.10.2024.

Bu gün şeýle bir geň zat boldy. Bir ýarym aý mundan öň durmuşymdan çykaran kişim täzeden ýüregimiň gapysyny kakdy.
Nähili geň! Üstünden şonça wagt geçipdir, ol henizem meni unutmandyr hemem meniňem oňa garşy öñki duýgularymda bolmagyma garaşypdyr. Emma şol geçen wagtda durmuşymda kän zat boldy. Azap edip, ony unutdym. Gyzyklanan kişilerim boldy. Soň ýene ýalňyzlyga öwrenişdim. Öz içki dünýäme täzeden berildim.
Indi yzyna dolanaga-da "Meni bagyşla!" diýeni bilen ony bagyşlaýmalymyka? Onuň ýoklugynda durmuşyma aralaşjak bolan adamlara-da gapylary düýpgöter ýapmalymyşym. Hemme zat şeýle aňsatmyka?
"Maňa wagt ber!" sözlerime ähmiýet berenok. Öňküsinden on esse köp ideýär... Ýaman ýeri, bu zatlaryň ýüregime ýaraýanyny duýýan...

****
31.10.2024

Käbir sosial mediýa gurşawlaryna üns berýän welin adamlar juda ýalňyz. Özleriniň suratlaryny köpçülik bilen paýlaşyp, ýaşyny, okan ýerlerini mahabatlandyrýarlar. Edýän ybadatlarynyň üsti bilen magtanýarlar. Hijaply gyzlar aýdym goýberip, öz gözelligini köpçülige ýetirýärler...
Hatda, käbir sahypalar bar: Geliň öz maglumatlaryňyzy aýdyň. Biz size mynasyp kişini tapyp bereli diýýärler... Geň ýeri, iň köp teswirleri şol sahypalar alýarlar. Adamlar çekinmezden şahsy maglumatlaryny teswirlere ýazýarlar. Okap güljegiňem, aglajagyňam bilmän oturýaň.
Soň bolsa has beterleri çykýar. "Türkmen" adyny aýlap-aýlap ýere pylçan zenanlar...
Bu gurşawdan ýuwaş-ýuwaşdan daşlaşmalydygy hakynda oýlanýaryn...

****

Bu gün onuň "Ertiriň haýyrly bolsun, prenses!" sms-i bilen güne başladym. Näme üçin bu idegliligiň uzaga çekmejegini, özüni bagyşladanyndan soň ýene şol öňki kişä dolanjagyny pikir edýärkäm?
Niçigem bolsa, ondan daşlaşyp bilemok...Ýüregi ýukalykmy, söýgümi?!

Forum | GÜRRÜŇDEŞLIK | Erkin mowzuklar