Täzeje
 Agzamen [off]
 19.11.2024 / 16:01

Men ýene hoşlaşyp ýola düşýärin...

Men ýene hoşlaşyp ýola düşýärin,
Münüp mawy demir atyñ böwrüne.
Goşhaltam çörekli, serim hyýally,
Üýtgeşik öwüşgin gözläp ömrüme.

Kem-kemden kiçelip dönýär nokada,
Obam — birmahalky oýnan düzlerim.
( Çigit deý göwnüme tapman aramy,
Men mydam bagtymy daşdan gözledim )

Käte tapdym, kä ýitirdim bagtymy,
Ötegçi şemal deý gezdim aýlanyp.
Ýeñles meýlislere paýlap wagtymy,
Kän kösendim, başarmadym aýñalyp.

Men ýene hoşlaşyp ýola düşýärin,
Baglap umydymy ýagty geljege.
( Ah, göwün-dä, uly dünýä syganok,
Sygyp dar biçüwli, ýuka penjege.)

Goşhaltamda çörek, serimde hyýal,
Gün ýaşmanka başga ýerde düşlärin.
Gözlerimi gözýetime tutduryp,
Men ýene hoşlaşyp ýola düşýärin.

Aşyr Hanow

Teswir ýazmak üçin Içeri giriň ýa-da Agza boluň →!