MGM : Sometimes you win, sometimes you learn..! #M.G.M.

 Özümiziňki
 Gulmahrem [off]
 26.11.2024 / 11:37

Duýgularňy ýelirgedýän,
Ýaz gijesi deý ýelli däl.
Geçmişiňi dörjeledýän,
Güýz gijesi deý heňli däl.
Bu gije päk göwnüň deýin,
Aý-aýdyňlyk, syrly däl.
Mähribanym, maýyl gije,
Mährem keşbiňe meňzeýär.

Gökde ýyldyzlaň şöhlesi,
Siňmiş ala nazaryňa.
Dolan Aýyň nur şuglasy,
Ornan gartaşan roýuňa.
Bag başynyň agraslygy,
Hut seni salýar oýuma.
Mähribanym, maýyl gije,
Mährem keşbiňe meňzeýär.

Edil häzir tebigatda,
Saňa meňzeş sadalyk bar.
Asmanda ýok bir bulut-da,
Ýerde sen deý kadalyk bar.
Bu meňzeşlik sygmaz bende,
Eje, gyzyň ylhamy dar.
Mähribanym, maýyl gije,
Mährem keşbiňe meňzeýär.

Suraý Amanakowa

Teswir ýazmak üçin Içeri giriň ýa-da Agza boluň →!