yureksiz : Asla biriniň umydyny kesme! Belki-de ýeke-täk eýe bolan zady şoldyr..#fileo

 Gytyndan
 Baron [off]
 11.12.2024 / 09:29
 “Her setirim ruhumdaky ýaramdyr...”

Ýoluň öwrüminde dur äpet gaýa,
Göýä dünýämize bergili ýalak.
Iri harplar bilen ýylçyr göwsüne
Ýazylypdyr “Myrat bilen Gülälek”.

Adatdaky ýaly gündi ol günem,
Dünýe parahatdy, durudy asman.
Göýä gözellige gark bolan ýaly,
Durdy bu gaýada iki ýaş juwan.

Ah, olaň arzuwy niçiksi giňdi...
Ýigit başarmandy pikirin jemläp.
Diňe şeý diýipdi gysgajyk sözde,
Gyzyň ýogyn saçlaryny gysymlap:

— Sen meňki bolarsyň...
Toýumyz bolar,
Bu gözleri öperin men ömürlik.
Bize sorag galar ajap ýyllardan,
Eşretli ýaşaýyş hem mydam birlik...

...Şonda gyz gülküsi daglara dolup,
Batly ýaňlanypdy jadyly ýalak.
Hawa, şol gün ýazylypdy bu ýazgam,
Iri harplar — “Myrat bilen Gülälek”.

Olaryň duýgusy gözeldi şeýle,
Durmuş!
Romantika!
Gaýgy-gam ýa:tdy,
Aýralyk diýen zat ýatlanylmazdy.
Ol söz söýülmeýän, elhenç bir zatdy.

Emma olar duşuşmandy şondan soň,
Ýigit urşa gitdi, aýralyk geldi.
Diňe ýylçyr goja gaýaň ýüzünde
Umytly ýazylan ýazgylar galdy.

Ýoluň öwrüminde dur äpet gaýa,
Delminip, birine garaşýan ýalak.
Iri harplar bilen ýylçyr göwsüne
Ýazylypdyr “Myrat bilen Gülälek”.


©Annasoltan KEKILOWA

Teswir ýazmak üçin Içeri giriň ýa-da Agza boluň →!