Iki sany täze goşgy

Premium

Belki [off]

27.01.2025 / 19:37
Söýenler terk edýär, a söýgi baky!

Öýkelegiň monology

Men günlerden gaty gördüm
Seni getirmäni üçin.
Men ykbaldan gaty gördüm
Bagta ýetirmäni üçin.

Aýan göwnüm aýamadyk
Gijelerden gaty gördüm.
Gülsem gülüp garamadyk
Didelerden gaty gördüm.

Yhlaslarym puja çykdy.
"Armalardan" öýkeledim.
Maňlaýymda bar-la gasyn,
Aýnalardan öýkeledim.

Soňy şowly soňlanmadyk
Gadamlardanam ynjadym.
Gussa ruhum ýesir eden
Aýdymlardanam ynjadym.

Mähir küýsämde bermedik
Gollar bilen öýkeleşdim.
Meni menden sogrup alan
Ýyllar bilen öýkeleṣdim.

Tozan basan albomlaryň
Gatlaryndan gaty gördüm.
Takdyryň alnyma ýazan
Hatlaryndan gaty gördüm.

Ýeller durmady ýerinde,
Ýollar geçdi öwrüm-öwrüm.
Bu gün ýene kä zatlardan
Öýkeläsi geldi göwnüň.

Synandym gaşym çytmaga,
Tapmadym ol ukybymy.
Görsem gutaran ekenim
Öýkelemek hukugymy.

01.01.2025

Arzuw

Men "Gitme" diýsedim galjakmydyň sen?
Keçjal ykbal berermidi nogtany?
"Gitme!" diýseň galýarmy nä möwsümler?
Garry pelek "Dur" diýeňde togtarmy?

Kineli söýgüňe, dertli göwnüňe
Gizlenpeçek sözüm bolarmy derman?
Intizar gülleriň gördüm solanyn,
Ýogsa olara-da diýipdim "Solmaň!".

Gök geýinen meýdan dolup-daşanda,
Ýag gijeler ýylmanak hem aý-aýdyň.
Şonda men: "Ýeň" diýdim, ýeňildi aşyk,
Men "Gutarma!" diýdim, gutardy aýdym.

"Dymma" diýenimde dymýar lal söýgi,
Geçip gidýär aýralygyň serhedin.
Indem saňa: "Bagtly bol" diýp dymýaryn,
Käşgä, betbagtlygy arzuw etsedim.

30.12.2024