PeRMaN : Bir gün gelip şeýle ynsana duşarsyňyz, saňa onuň gözlerinde takdyryňyz seredip duranlygyny ýüregiňiz duýar...

 Özümiziňki
 Hyyalbent [off]
 29.01.2025 / 18:30

Ýatyp bilmez gursaklary gohlular,
Ýadaw başyn ýere goýan badyna.
Ýarygije.Geçip barýan otlular,
Süýnüp barýan ömri salýar ýadyňa.

Şonda gözleriňe uky gelenok,
Ýaşlygyn ýatlaýaň zülpleri towlyň.
Ýukalýan ýüregiň öňküligi ýok,
Öňki howasy ýok haýbatly howlyň.

Öňki gaýraty ýok garran pederiň,
Dik synasy barha egilip barýar.
Gören ömür beterinden beterin,
Gözümiň alnynda sowulyp barýar.

Sowlup barýar ýyllar ýyldyrym ýaly
Hernä ir heniz-ä pellä ýeterden.
Gagşan günleriňde ýylnaryň ýaly,
Şükür, pent bary galýar pederden.

Ýaşap ýörsüň söküp uly şäheri,
Duşup ýagşy-ýaman adamy bilen.
Şeýdip, her gün garşylaýaň säheri,
Menzili, mukamy, matamy bilen.

Gyssanýarsyň barka tende ysgynyň,
Nyşan goýmak üçin geljek nesile.
Käte-käte oýanýarsyň tisginip,
Zogun çalyp barýan ömrüň sesine.

Gylyçmyrat Kakabaýew

Teswir ýazmak üçin Içeri giriň ýa-da Agza boluň →!