“Giç düşündim peltek diline dünýäň...”...

Gytyndan
Baron [off]

03.02.2025 / 04:04
“Her setirim ruhumdaky ýaramdyr...”

Dostum, biten ýaralarmy gorjama,
Dostum, ýiten duýgularmy oýarma.
Şahyryň ýüregi ýanýan borjaga
Meňzeşdir, çabyrar, barma golaýna.

Ömrüm geçer öýtmeýärdim beýle tiz,
Ýatlamalaň aşagynda lagşadym.
Ýyllar mejbur etdi, ýogsa meýletin
Şatlyk bilen hasratlary çalşar kim?!

Derýa deý tenimde ýüregim – gaýyk,
Halys boldum, dagdy boldum minnetden.
Sen nämä garaşjak aýdymy söýüp,
Şahyryny aç öldüren milletden?!

Ykbalyma alkyş baryn aýdardym,
Ýel deý sarç täleýim bolsa ibaly.
Birçak menem meşhur borun öýderdim
Çingiz Törekuliç Aýtmatow ýaly.

Ezeli kysmatyň hiç zat üýtgetmez,
Ne aýdym, ne-de bir ýanyp-jowranma.
Giç düşündim peltek diline dünýäň,
Giç düşündim azap üçin doglanma.

Hemem näme üçin ir düşdüm tapdan,
Paýawlady hatda bolsadylarym.
Arasynda hatar duran kitaplaň
Saýlanan eserlem bolmady meniň.

Birçak mawy bulut ýaly sadadym,
Ýagyp-ýagyp, hezil edip diňýärdim.
Gözünde gizlenip gara gijeleň,
Ýyldyzlaryň aýdymyny diňlärdim.

Perişdeleň sesi ýaly mylaýym
Owazlar asyrlaň üstünden çawup,
Näzik ýüregimi tämizläp gaýym,
Bakylyk barada çakardy çawuş.

Birçak arzuwlarym meňzeşdi köle,
Bugardy, gugardy, suwy çekildi.
Ýadadym, ýaşamak islämok, ýöne
Ölübem bilemok adam şekilli.

Göz gubarda, maňlaý bolsa gasynda,
Göwnüm diýýär: “Ter güllere bol maýyl!”
Delmuryp Hudaýyň bosagasynda,
Özüme garaşyp duran bolmaýyn.

Bu zatlary janym ýanansoň diýýän,
Bilýän dürs däldigin şeýle pikirleň.
Meger, men iň soňky genisi dünýäň
Kemsidilen, ýekirilen, ýitirlen.

Başarsaň, şahyra diýme küpür gep,
Ýympyk sözler bilen dörme derdini.
Ýüwrüp gelýän ýüz ýyllyklar süpürmez
Şahyryň kalplara ýazan beýdini.

Goýmaz hakykaty söýmek gylygyn
Ot-elek ýürekleň ýazlygy üçin.
Şahyr ölýär tutup bir gün ýüregin
Ýüreksiz adamlaň barlygy üçin.

Söz bilen döreder ýürekde galkym,
Aglap duran ýürekleri diňdirer.
Dostum, şahyryny har eden halkyň
Hudaý bilen arasynda kim durar?!

Gedemlik, gödeklik saklamaýar müýn,
Il agysy piňine-de däl onuň.
Adam öz keýpini sazlamak üçin
Bozýar baky sazlaşygny älemiň.

Bile bişip, bile ýanyp-solaryn,
Baglar ýapragyny düşürende ir.
Menem ortaçarak şahyr bolaryn
Sözüň nämedigne düşünende il.

Göçen bulut ýaly, öçen ot ýaly,
Uçan guş deý geçen gelmez öwrülip.
Dostum, biten ýaralarmy gorjama
Hemem göwnüm üçin berme göwünlik.

1986ý.

©Gurbandurdy ORAZOW

149

Forum | UMUMY BÖLÜM | Şygyryýet dünýäsi

Erkek kişiden görelde alarlyk 7 häsiýet

Jogapsyz sowal...

Erkek kişiden görelde alarlyk 7 häsiýet

Erkek kişiden görelde alarlyk 7 häsiýet

Ýürekdeş saýtymyzdaky mowzukçy agzalarmyza täzelik

Erkek kişiden görelde alarlyk 7 häsiýet

Erkek kişiden görelde alarlyk 7 häsiýet

Erkek kişiden görelde alarlyk 7 häsiýet

Käbäme

Aÿyplaşma!!!