Admin : Kimde-kim özüne degişli bagty bilmekçi bolsa, onda ol hökman hemme zatdan daşlaşyp görmeli.

Premium
 BAYOGUL [on]
 14.02.2025 / 21:21
 Yurekdesh.ru

Her bir ýurduň döwlet baýdagynda ruhy gymmatlyklaryny, geçmişini we medeniýetini alamatlandyrýan şekiller bolýar. Köp ýurduň baýdagyny tanaýan hem bolsak, olaryň manylaryny bilmeýäris. Geliň, beýleki ýurtlaryň baýdaklarynyň näme many aňladýandygyna seredeliň!
Fransiýanyň baýdagyndaky ak reňk irki döwürlerden bäri bar bolup, patyşanyň nyşany hasaplanýar. Gök we gyzyl reňkler ýurduň paýtagty Pariži alamatlandyrýar.
Kanadanyň baýdagyny klýon agajynyň ýapragy bezeýär. Ýüzlerçe adadan emele gelen ýurtda giň tokaýlyklar bar. Irki döwürlerde Kanadanyň ýerli ýaşaýjylary agaç ýapragynyň şowlulyk getirýändigine ynanypdyrlar. Bu baýdak 1965-nji ýyldan bäri ulanylýar.
Adatça, baýdaklar dörtburçluk görnüşinde bolýar.
Emma Günorta Aziýadaky Nepalyň baýdagy iki sany üçburçluk şekilden emele gelen. Baýdagyň üçburç şekili ýurduň uly bölegini emele getirýän Gimalaý daglarynyň gerişlerini alamatlandyrýar. Gyzyl reňkli baýdagyň ýüzündäki Gün we Aý asudalygyň nyşany hasaplanýar. Baýdakda ýurduň milli güli hasaplanýan «rhododendron» gülüniň suraty hem ýerleşdirilipdir.
Daniýanyň baýdagy dünýäniň iň gadymy baýdagy hökmünde Ginnesiň Bütindünýä rekordlar kitabyna girizildi. Bu baýdagyň soňky gezek üýtgedilenine 400 ýyl bolup barýar. Baýdakdaky ak reňk parahatçylygy, gyzyl reňk bolsa, üstünligi we gahrymanlygy alamatlandyrýar.
Hindistanyň baýdagynda köp medeniýetliligi alamatlandyrýan şekiller bar. Ýaşyl we sary reňkler ýurtda ýaşaýan dürli milletleriň, ak reňk bolsa parahatçylygyň nyşany hasaplanýar. Baýdagyň ortasyndaky gök reňkli halkanyň içindäki 24 sany çyzyk günüň 24 sagadyny alamatlandyrýar.
Bagama adalarynyň baýdagyndaky altynsow sary reňk ýurduň giň deňiz kenarlaryny, açyk gök ýurduň daşyny gurşaýan deňizlerini, üçburçluk şekil tebigy baýlyklaryny alamatlandyrýar.
Baýdaklar bilen
bagly täsin
maglumatlar

Hiç bir ýurduň baýdagynda melewşe reňk ýok.
Gyzyl, ak we gök reňkler bilelikde we aýratynlykda iň köp gabat gelýän reňklerdir.
Ýyldyz iň köp ulanylýan simwol hasaplanýar.
Daniýanyň baýdagy 1319-njy ýylda döredilipdir. Şondan bäri baýdaga birnäçe gezek kiçiräk üýtgeşmeler girizilipdir.
Adatça, baýdaklaryň şekili 2×3 ölçeginde bolýar. Watikanyň we Şweýsariýanyň baýdaklary bolsa, inedördül şekilindedir.
Braziliýanyň baýdagy iň köp reňkden emele gelen baýdak hasaplanýar. Baýdakda jemi 12 reňk bar

Teswir ýazmak üçin Içeri giriň ýa-da Agza boluň →!