Öküzçe hakda durmuşy wakajyk

Öwreniji
bagabat [off]

28.07.2025 / 08:39

Oglankak biziň bir samsyk öküzçämiz bardy.
Tüýs barypýatan manadüşmez tentekdi.
Näçe pugta daňsaň daň-aý, däli güýçden özge beýnisi katra-da akyl nemine yzgarlanmadyk, ýaman gylyksyzdan gelen bir kakabaş, hötjet tüntaw, eýdip-beýdip ahyrsoňy boşanardy-da, mellegimizdäki gök ekinleriň içinde jyrtlap, ne gözel ýetişip duran hyýarly, bulgar burçly, pomidorly, badamjanly biýaralary torç ederdi.
Olaram uly maşgalanyň ýetişerine gözüni dikip garaşyp duran, belli bir derejede günemasy şoňa bagly, uludan-kiçi joýalarda der döküp, yhlas siňdirilip ýetişdirilen ekinler bolansoň, ýaňky mahawyň goparan, goparýan bihuda, bimany reýgany-weýrançylygyna nebsiň-janyň agyrardy.
Üstesine-de o nejisi goňşy-golam bolup üýşüp, kowalap, gabap tutmagam iş bolardy.
Her sapar tutulandan soňra tä üç-dört günläp hatda iýminem almaga mejalsyz, ýatagynda usurgap ýatar derejede galmaz bolýança, suwasalma ýenjilse-de, ol akmak, hatda taýak bilenem ýola getirip bolmaýan, barypýatan ýerindengelme kütek janawerdi. Ýogsa, «irmän-arman ýenjip dursaň, ahyry bir gün haýwandanam adam ýasap bolýar» diýilýändir welin, şol edrenj-ä tommaý taýak astyna alyp, näçe saýsaň saýyber, ölmese düzeljekden däldi.
Galyň işilen ýüpi-de kertip-kertip boşanandan soň, ony zynjyrlabam gördüler.
Bolmady.
Ýene nädip boşandy?
Bellisi ýok, bir gün boşandy.
Özem şol sapar: «Siz şeýtseňiz war-a, menem ine beýdýän-aý, bar-a!» diýýän pisint, halys ajalyna gol bulaýan ol zandyýaman aňkaw, diňe biziň öz mellegimizi torç edeni bilen çäklenmän goňşularyňam hasyly bu gün-erte bolup duran ekinini toýnak astyna aldy.
Şolam şol sähnäniň kütdeje ömründe goýberen iň soňky hatasy bolup, öňem oňa içi ýanyp ýören kakam pahyryň dergazap göwnündäki gyrma-gyr ahwalda duran sabyr käsesine daman, ahyrky damja boldy.
Ertesi gün gassap dostuny getiren kakam, şol, näçe «edep» berilse-de terbiýe almanjyklar geçen öküzçäni ymykly, dagy-duwara ýatagyndan «boşanmaz» ýaly etdirdi.
Men soň-soňlar şol akylýokmaz sähne-de bolsa, şeýle erkinliksöýer öküzçämize birneme gynanmanam durmazdym.
Emma ulaldygymsaýy aňyma bir zat ýetdi: Sen taýak üsti bilen berlen terbiýäni, akly al, alma, zandy-ýasawyň, asly gelip çykyşyň mal bolsa, edepli bolsaňam, bolmasaňam, ahyrsoňunda soýlup iýiljek bolsaň, näme bolaňda näme?
Nähili bolaňda näme?
Haçan bolaňda näme?
Nirede bolaňda, nädip bolaňda näme?...

Forum | UMUMY BÖLÜM | Erkin mowzuklar

Seni tanasym gelýär: 2. Ahal

BAGLYLYK

BAGLYLYK

Bir arapdan_bir şarapdan №7

Bir arapdan_bir şarapdan №7

Bir arapdan_bir şarapdan №7

Yurekdesh.ru - ýürekdeşde ilkinji gezek goýuldy

Bir arapdan_bir şarapdan №7

Seni tanasym gelýär: 2. Ahal

Seni tanasym gelýär: 2. Ahal