Özümiziňki
 medet_mededi [off]
 12.08.2025 / 15:12

Şygryýet ýoluna ak pata beren,
Ussadym, halypam Aşyrmät Garly.
Kalbyma nur çaýdy sözleri bilen,
Ussadym, halypam Aşyrmät Garly.

Beýikligi dagyň çür başyna deň,
Şygyrlary döwre sazlaşykly heň,
Nesihatyn alyp hyruçlandym men,
Ussadym, halypam Aşyrmät Garly.

Sözlerinde agyrlyk bar, many bar,
Tebsirän duýgular bolýar lälezar,
Halk üçin döredýär, ýazýar, işleýär,
Ussadym, halypam Aşyrmät Garly.

Hem proza, hem poeziýa ussady,
Eserlerin okap bolýaň şaýady.
Sungaty gözeldir, meşhurdyr ady,
Ussadym, halypam Aşyrmät Garly.

Edebiýatda uly işler bitirýär,
Şägirtleri ýetişdirýär, getirýär,
Hak söz üçin galamyny göterýär,
Ussadym, halypam Aşyrmät Garly.

Nesihatyn diňläp baş arşa ýetdi,
Göwnüm joşdy, ylham gomlaryn atdy,
Bu gün size duşmak miýesser etdi,
Ussadym, halypam Aşyrmät Garly.

Medet MEDEDOW

Aşgabat ş. 2023ý.

Teswir ýazmak üçin Içeri giriň ýa-da Agza boluň →!