Özümiziňki
 medet_mededi [off]
 17.08.2025 / 10:19

Ýaşuly, ýaşkiçisi bar,
Dostlarymyň arasynda.
Deň-duşlaryň niçesi bar,
Dostlarymyň arasynda.

Ganat bolsaň, dostuň ýelek,
Çyn dostlar - un, wagt - elek.
Sözleýän ýok asla telek,
Dostlarymyň arasynda.

Çagalykda sataşanym,
Oýunjaklary çalyşanym.
Bar mekdepde tanyşanym,
Dostlarymyň arasynda.

Geçdik çagalygyň ýolun,
Bezedi kalbymyň törün.
Synpdaşlarym tutýar orun,
Dostlarymyň arasynda.

Gullukdaşym - çyn ýaranym,
Sak durup Watan goranym,
Kän hal-ahwalyn soranym.
Dostlarymyň arasynda.

Talyp dostlam tapýar göwnüm,
Durmuş ýoly etdi öwrüm,
Hezil döwri geldi ömrüň,
Dostlarymyň arasynda.

Dosta bagly içim-daşym,
Şolar bilen ýazdyr gyşym.
Meslekdeşim - galamdaşym,
Dostlarymyň arasynda.

Medet MEDEDOW

Mowzukda teswirler ýok! Siz ilkinji bolup teswir ýazyň!

Teswir ýazmak üçin Içeri giriň ýa-da Agza boluň →!