boshver : Gapysyz jaý gurup, myhmana garaşmañ..# fileo

 Gytyndan
 Baron [off]
 14.12.2024 / 10:34
 “Her setirim ruhumdaky ýaramdyr...”

Sen erkli gelindiň, ýöne şo sapar
Öz erkiňi gowşadasyň gelipdi.
Diliň «çekil», gözüň diýýärdi «apar»,
Içiňi bir gowzadasyň gelipdi.

Otuz bäş ýaş berk ýaş bolar mizärden,
Entek seniň araň daşdyr güýzärden.
Gowy görýän joraňdanam bizardyň,
Çünki şol gün «obadaşyň» gelipdi.

Gözüňe yssydy pesler-beýikler,
Gördüň şol gün her köýnegiň geýipler.
Bolýar-a birhili ötegçi keýpler,
Jynly ýaly oýnaşasyň gelipdi.

Ýürek böküp dursa, nämedir çäräň?
Şonuň üçin golaý tutýardyň araň.
Etmek isläňokdyň özüňi arzan,
Meni kemsiz gowşadasyň gelipdi.

Diliň bilen «Oňat otur!» diýseň-de,
«Oturma!» diýp, haýyş bardy didäňde.
Bu durmuşda ýürekdeşiň idäň-de,
Yşk söhbedin gowja edesiň gelipdi.

Meňkiden öwerlik däldi ýagdaýyň,
Owsunyp otyrdyň dolan Aý deýin.
Soňam diýdiň: «Alyp barýaň, nädeýin?!»
Ýöne welin ogşadasyň gelipdi.


©Italmaz AKMYRADOW

Teswir ýazmak üçin Içeri giriň ýa-da Agza boluň →!