Gerceknazar : "Bagt nirde?" diýdi , diýdim gülüp men, Gözlemeli ony her kynçylykdan. @Gerçeknazar

 Gytyndan
 Pegas [off]
 14.02.2025 / 08:18
 “Her setirim ruhumdaky ýaramdyr...”

Bu agşamda ata ogla käýänok
Nirädir bir ýere gidýäni üçin.
Nirädir bir ýere gidýäni üçin
Ene-de gyzyna bakanok içgin.

Barja diýilýäni: “Wagtynda gelgin!”
Çala baş atylar, gutarar gürrüň.
Gapyny daşyndan ýapan ýürekler
Wadalaşan ýerne atygsar derrew.

Bir eli hallanlap barýandyr weli,
Hökman goltukdadyr beýleki eli.
Berk tutup barýandyr şol eli bilen
Söwer ýara gowşuryljak ter güli.

Ýeke özi däldir atygsap barýan,
Kändir ýol ugrunda heserdeşleri.
Her biri ýakymly atyr sepinip,
Ýag çalynyp, daralypdyr saçlary.

Irräkden alada edenler bolsa
Eýýäm, göýä, goşa gumry mysaly,
“Söýgi güni” bilen mübärekleýär
Özlerine iň bir eziz ynsany.

Bu eziz pursada kaklyşyp nazar,
Gözler aýaklary tijeýär has-da.
Ýa-ha belleşilen ýer örän uzak,
Ýa-da ädimleriň arasy gysga.

Howlugýar,
howlugýar,
howlugýar ýürek,
Howlukdygyça-da, çalt urýar barha.
...Ýöne eýýäm sähel menzil galypdyr,
Atylypdyr ýoluň köpüsi arka.

“Ýoly ýörän ýeňer” diýilen söz bar,
Ynha, wadaly ýer.
Ynha, söwer ýar.
Eziz pursatlaňam iň bir ezizi —
Söýýän ýürek söýýän ýüregi guçýar.

...Şu ýerde goşgynam edeýin tamam,
Soňky pursatlaryň öz goşgusy bar.


©Agageldi ITALMAZOW

Teswir ýazmak üçin Içeri giriň ýa-da Agza boluň →!