Tarawa namazy. | YekeTak.Ru

Özümiziňki
Unknown_ [off]

11.03.2024 / 20:16

Tarawa namazy Remezan aýyna mahsus 20 rekegatdan ybarat bolan bir
müekked sünnetdir. Erkek bolsun, zenan bolsun, her ikisi üçin hem sünnetdir. Ýassy namazyndan soň we witir namazyndan öň okalar. Tarawa namazyny her iki rekegatdan bir salam berip, on salam bilen soňlamak has fazylatlydyr. Rasulallah sallallahu aleýhi wesellem aýtdy: “Kim ynanyp we sogabyny diňe Allahu Tagaladan garaşyp, gijeleri namaz okap, Remezan aýyny ybadat bilen geçirse, (gul hakyndan başga) geçen günäleri bagyşlanar”. Rasulallah sallallahu aleýhi wesellem aýtdy: “Hakykatdan hem Allahu Tagala size Remezan orazasyny parz etdi. Men hem size tarawa namazyny okap, ybadat etmegi sünnet etdim. Haýsy bir adam ynanyp we sogabyny Allahu Tagaladan garaşyp, Remezan orazasyny tutsa we tarawa namazyny okasa, ilkinji dogan günündäki ýaly kiçi günälerinden päklener.”
Ymamy Gazaly hezretleri tarawa namazynyň fazylaty barada şeýle aýdypdyr: “Hezreti Aly razyýallahu anhudan rowaýat edilipdir: “Haýsy bir adam Remezany şerifiň:
1-nji gijesi tarawa namazyny okasa, enesinden dogan güni ýaly günälerinden päklener.
2-nji gijesi okasa, Allahu Tagala, eger mömin bolsalar, enesiniň we atasynyň bütin günälerini bagyşlar.
3-nji gije okasa, Arşyň aşagyndaky perişdeler ol kişini buşlap aýdarlar: “Eý, pylan kişi! Saňa buşluk bolsun! Allahu Tagala seniň amalyňy kabul edip, umyt eden döwletiňe (nygmatyňa) duş eýledi”.
4-nji gije okasa, Tewrat, Injil, Zebur we Kurany kerimi okan ýaly Allahu Tagala ol kişä sogap yhsan eder.
5-nji gijesi okasa, Allahu Tagala oňa mesjidi Haramda, mesjidi Nebewide we mesjidi Aksada namaz okanlaryň sogabyny berer.
6-njy gije okasa, Beýtil magmury (Perişdeleriň togap, haj edýän ýeri) togap eden ýaly sogap gazanar. Daglaryň, daşlaryň we gumlaryň hemmesi onuň üçin istigfar ederler, ýagny onuň günäsiniň geçilmegini Alla Tagaladan sorarlar.
7-nji gije okasa, Musa aleýhis salama duşup, Firawun we Hamana garşy Musa aleýhissalama kömek eden ýaly bolar.
8-nji gije okasa, Bedir söweşine gatnaşan ýalydyr. Şeýle-de Allahu Tagala oňa Ybraýym aleýhis salama beren sogabyny berer.
9-njy gije okasa, toba eden Dawud aleýhis salamyň ybadaty we Rasulallah sallallahu aleýhi wesellemiň tagaty ýaly
Allahu Tagalaga ybadat eden ýalydyr.
10-njy gije okasa, Allahu Tagala oňa dünýä we ahyrýet salamatyny berer we iki jahanyň haýyrlaryny bagyş eder. Şeýle de 70 müň we has köp kişä şepagatçy bolar.
11-nji gije okasa, dünýäden suwa ganyp gider we Syrat köprüsini ýyldyrym ýaly geçer.
12-nji gije okasa, Allahu Tagala oňa 70 sany kabul edilen haj we umra sogabyny ýazar we magşar meýdanyna on dördi gijesindäki aý ýaly nurly bolup geler.
13-nji gije okasa, Beýtullany abadanlaşdyran kişiler we ol ýerde bolan Pygamberler, syddyklar, şehitler we salyhlar ýaly sogaplara gowuşar we kyýamat güni bütin erbetliklerden aman bolup, Magşar meýdanyna geler.
14-nji gije okasa, Gadyr gijesine ýetip, Hajerul-eswed bilen Makamy Ybraýym arasynda namaz okan ýaly bolar we perişdeler onuň tarawa namazyny okandygyna şaýat bolup, Magşar meýdanyna gelerler. Bu sebäpli kyýamat gününde Allahu Tagala ony (agyr) hasaba çekmez.
15-nji gije okasa, Allahu Tagala ol kişiniň hajatyny we dogasyny kabul eder. Taryp edip bolmajak sylaglary oňa berer. Şeýle de perişdeler, aýratyn hem Arşy we kürsini saklaýan perişdeler oňa bereket ýagdyrarlar.
16-njy gije okasa, dünýäden ahyrýede gidende we kyýamat güni gabyrdan turanda “Lä ilähe illallah” diýip turar. Şeýlelikde, Allahu Tagala oňa jähennemden halas boluş we jennete giriş beragaty (aklanmany) ýazar.
17-nji gije okasa, dünýäden gitmänkä jenneti agladaky ýerini görer we oňa Pygamberleriň sogabynyň bir meňzeşi bagyşlanar.
18-nji gije okasa, şehitler we gazylara berilen sogap ýaly sogap beriler we oňa: “Eý, Allahyň guly! Şübhesiz Allahu Tagala senden hem, eneň we ataňdan hem razy bolandyr”-diýip, owaz geler.
19-njy gije okasa, Allahu Tagala oňa dünýä we ahyrýet kynçylyklaryna garşy käfi (ýeterlik) bolar we Firdews jennnetinde derejelerini beýgelder.
20-nji gije okasa, Rasulallah sallallahu aleýhi wesellemi görmän, özüni jennet bilen buşlaman we perişdeler ony zyýarat etmän, dünýäden geçmez.
21-nji gije okasa, Allahu Tagala oňa jennetde nurdan bir köşk bina eder we ol kişä ýerdäkileriň we gökdäkileriň sanyça, sogap ýazar.
22-nji gije okasa, Allahu Tagala oňa Ummaty Muhammed sallallahu aleýhi wesellemiň ýetimlerini we dullaryny doýuran ýaly sogap berer.
23-nji gije okasa, Ummaty Muhammed sallallahu aleýhi wesellemiň ýetimlerini satyn alyp, azat eden ýaly sogap gazanar we Allahu Tagala oňa jennetde bir şäher bina eder.
24-nji gije okasa, Allahu Tagala onuň amalyny sag tarapyndan berer.
25-nji gije okasa, ölüm perişdesi oňa iň gowy görnüşde geler we ony jennet nygmatlary bilen buşlar. Allahu Tagala oňa gabyr azabyny bermez.
26-njy gije okasa, Allahu Tagalanyň emri bilen perişdeler ol kişini şeýtanyň şerinden gorarlar.
27-nji gije okasa, Allahu Tagala jennet perişdesi bolan Ryzwana jennetiň gapylaryny onuň üçin açmagyny emir eder.
28-nji gije okasa, Allahu Tagala oňa jähennemiň gapylaryny ýapmaklaryny perişdelere emir eder. Şeýle-de onuň jennetdäki müň derejesini beýgelder.
29-njy gije okasa, Eýýub aleýhis salamyň dört sany bela sabyr edip alan sogaby ýaly sogap gazanar we bütin günäleri bagyşlanar.
30-njy gije okasa, Allahu Tagalanyň emri bilen Arşyň aşagyndan bir jarçy şeýle seslener: “Gije tarawa namazyny okan gullar, jähennemden azat bolan gullardyr. Gorkan jähenneminden halas bolup, umyt eden jennetine we Allahu Tagalanyň jemalyna duş bolanlardyr”. Allahu Tagala aýtdy: “Yzzatymyň we jelalymyň haky üçin, bu gullarymy afw eýledim. Jähennem oduny bedenlerine haram eýledim”. Soň Allahu Tagala emir eder, ol gullar erkek bolsun, zenan bolsun, jähennem azabyndan halas bolmak we Syrat köprüsini aňsatlyk bilen geçmek üçin beragat ýazylar. Haýsy bir adam ynanyp, 30 gije tarawa namazyny okasa, Allahu Tagala bu sogaplary ol bendä şeksiz we şübhesiz yhsan eder”.

Çeşme: Buhary;
Nesaýy;
Dürretul-Waizin.