Nesip : Nesip@ Şeýtan hem adam keşbine girip azdyrýar.

 Özümiziňki
 Hyyalbent [off]
 01.02.2025 / 20:57

Hor. Ýellenen gabakly,
Gözi ýaşly bir aýal,
Içi öli bäbekli
Sallançagyn yraýar.

Gideňkirläp eňkamy,
Çöküşipdir duluklar.
Endiredip heňňamy,
Eňreşip dur bulutlar.

Döwür gurby gaçaly,
Dönen ýaly bizara,
Çaga bilen ajaly,
Mündiripdir mizana.

Garyp ene içerde,
Jansyz çaga esedýär.
Şemal şuwlap daşarda,
Zaryn-zaryn ses edýär.

Jar edýän dek jahana,
Güýz agysyn akrapda,
Şygyrdaşyp şahada,
Pyşyrdaýar ýapraklar:

«Aýdylmaz bu tünekde,
«Allan-allan, allançak.»
Gasyn galar ýürekde,
Boşap galar sallançak.

Öňküsi dek ir turup,
Ene oglun ýanamaz.
Galpajygyn syrdyryp,
Dişjagazyn sanamaz.

Dertlän çagy darygmaz,
Sypaplar söýlüýänin.
Haraý gözläp, çagyrmaz,
Bäbekleriň öwlüýäsin.

Synlap, begenmez aşa,
Ogluň syrdam synasyn.
Otyr ezip gözýaşa,
Sary giden gynajyn.

Garört boldy kamaty,
Gyşlar aldy ýazyny.
Ýa ýaradan, nämedi,
Bu biçäräň ýazygy?

Guwanman zürýadyna,
Göwünler döwülmäsi.
Ýetişmediň dadyna,
Bäbeklerin, öwülýäsi!

Ogyr naçar, näm etsin,
(Bir balajyk ber ýene!)
Meňzäp eli bäbeksiz
Meşhur Bibi Merýeme.

Hor. Ýellenen gabakly,
Gözi ýaşly bir aýal,
Içi öli bäbekli
Sallançagyn yraýar.

Jigerini daglaýar,
Örtäpler ogul ýasy.
Silkinipler aglaýar,
Bäbekleriň öwülýäsi...

Gylyçmyrat Kakabaýew

Teswir ýazmak üçin Içeri giriň ýa-da Agza boluň →!